مامۆستا سەييد جەلالەددين حسێني كێ بوو؟
مێژووي گەلاني جيهان پڕە لە مرۆڤي شياوي ستايش كە لەبوارە جياجياكاندا شوێنەواري هەتاهەتاييان لەخۆيان بە جيهێشتووە و بە يادكردنەوەيان و مونۆمێنت دروست كردن و نووسين لەسەريان ڕێزيان لێدەگێڕێ و شانازييان پێوە دەكرێ.
لەمێژووي گەلي كورديش كەم نين ئەو مرۆڤانەي كە بە كردوە و بەرهەم و خزمەتەكانيان خۆشەويستن و جێگەي شانازين و هێماي نەتەوەيين. نەتەوەي كورد بە هۆي ئەوي كە ساڵيانێكي دورودرێژە لە ژێر زوڵم و ستەمي ستەمكاران و داگێڕكەران دايە، بەشێكي زۆري وزە و تين و هەوڵ و مێژووي تەرخان كراوە بۆ نەهێشتني ستەمي ستەمكاران. بەشێكي بەرفراوان لە ژياني گەلەكەمان تايبەت بەخەبات و بەرخودان و شۆڕشگێري بووە و ديرۆكي نەتەوەكەمان پڕە لەداستاني ڕاپەرين و شۆڕش و خۆڕاگري و شكست و نوشووستي و هەستانەوە و تێهەڵچوونەوەي دووبارە بەرەو ئامانجي ڕزگاري يەكجارەكي.
ئەو حەقيقەتە وايكردووە زۆربەي هەرە زۆري كەسايەتيە هەڵكەوتوو و شياوي پەسنەكانمان لە مەيداني خەباتي ڕزگاريخوازنەدابن. مێژوي گەلە چەساوەكەمان پڕە لەو كەڵەپياوانەي كە وەك ئەستێريەكي پڕشنگدار لەئاسماني كوردستان دەركەوتوون و بەكردەوە و هەڵسوكەوتيان بوونەتە هێماي نەتەوەيي و ڕووگەي هيوا و ئاوات و هێماي خۆڕاگري و بەرخودان و جێي شانازي و گرينگي پێدان. يەك لەو كەڵەپياوە هەڵكەوتووانەي نەتەوەكەمان، ماوەيەك لەمەوپێش دڵە گەورەكەي لە وێستان كەوت و بە كۆچي دڵـتەزێني، زامێكي جەرگبڕي خستە سەر دڵي زۆربەي دانيشتوواني كوردستان.
بەڵێ، مامۆستا سەيد جەلالەددين حسێني كە تەمەني ٨٢ ساڵي تێپەڕ كردبوو و مێژووي٦٠ ساڵ خەبات و ڕەنج و مەينەتي لەپێناو بايەخەكاني نەتەوەي كورد لە كوردستاني ئێران هەبوو، مەرگ زياتر لەوە مەوداي نەدا و لەسۆز و لەناخي پڕ لەخەمخۆريي ئەو مرۆڤە بەرزە، بۆ هەتاهەتايە بێبەشي كردين.
مخابن، جەنابي مامۆستا تا ئەو كاتەي لەژياندا مابوو هەرگيز ئەو جۆرەي كە پێويست بوو ئەو ڕێزەي شايەني كەسايەتي و گەورەيي بوو، لێي نەگێڕا و وەك پێويست كەڵك لەو مەكۆيە لە مەعريفەت و زانين و تێگەيشتنەكاني وەرنەگێڕا و مەزنايەتيي ئەو مرۆڤە بليمەتمان هەست پێنەكرد و پێي نەزاندرا. ئاوابووني ئەو خۆرە پڕتيرێژە، يەكجار دڵتەزين و زيانبار بوو، بەڵام ڕەورەوەي ژيان ناوێستێ و بەردەوام لەجووڵە دايە، ئەوە ڕاستيەكە و ئێمە هاوبيران و ڕيبواراني ڕێبازە پيرۆزەكەي دەبێ خۆي لەگەڵ هاوڕەنگ و ئەو حەقيقەتە تاڵە قەبووڵ بكەين. ڕاستە لە وجوودي جەستەيي مامۆستا بێبەش بووين و ئيتر مامۆستا بە جەستە لەناومان دا نييە، بەڵام هزر و ڕوانگە و هەڵويستەكاني مامۆستا لەناو نەچوون و لەناويش ناچن. بێ گومان ڕوحي مەعنەويي مامۆستا بۆ هەتا هەتايە لەناو دڵماندا دەمێنێ و وەك جاري جاران وەك قەڵايێكي قايم، پشت و پەنامان دەبێ و دەبێتە چۆلەچرا و ڕووناككەرەوەي ڕێبازي خەباتمان لەپێناو ڕزگاريي نيشتماني داگێڕكراومان. پێويستە لەسەرمان بە ڕووناكي خستنە سەر كەسايەتي بەرزي مامۆستا زياتر ڕوانگە و كەسايەتي و بۆچوونەكاني مامۆستا بخەينە بەرچاوي جەماوەري كوردستان و نەوەي نوێي پێ ئاشنا بكەين و هەوڵي ڕاهێنان و بارهێنان و گۆشكردنيان لەسەر ئەو بيروباوەڕ و ئاكارانەي مامۆستاي نەمرمان بدەين.
تيشك خستنە سەرسەرجەم لايەنەكاني ژياني مامۆستاي نەمر، هەرگيز لە تواناي ئەو بابەتە و دەيان و سەدان بابەتي ديكەدا نييە و پێويستي بە دەيان كۆڕ و سمينار و لێتوێژينەوەي زانستي و پسپۆڕييە. بەڵام من بە نۆرەي خۆم هەوڵ دەدەم چەند لايەن لە تايبەتمەندييەكاني مامۆستا كە جێگەي سەرسامي و دەرخەري مەزني مامۆستا سەيد جەلالن بخەمە بەر ڕاڤە و بە پێي توانا بەشێك لەحەقيقەتە نەدركاوەكاني بخەمە بەر ديدي خوێنەران.
سەرەتا بۆ چوونە ناو باسەكەمان، چاوێك بە مێژووي ژياني جەنابي مامۆستا و چوونيەتي ئاوێتەبووني لەگەڵ دۆزي نەتەوەكەي و هەوڵدان بۆ گەيشتن بە ڕزگاري و بەسەرهاتەكانيدا دەخشێنين كە لەناو ئەو مێژووە پڕ هەوراز و نشێوەدا، زياتر كەسايەتيي مامۆستامان بۆ دەردەكەوێ. مامۆستا لەبنەماڵەيێكي ئايين پەروەر و خوێندەوار كە باوكي قازي بوو، چاوي بە دونياي پر لە زوڵم و نابەرابەري هەڵێنا. لەسەرەتاي منداڵيەوە لەگەڵ بەشێكي بەرچاو لە زانستەكاني ئەو كات كە لەلايەن جەنابي باوكي، قازي مەلا شێخ ساڵحي واژەيي ـ بەرزەنجي، پێي گوترا ئاشنا دەبێ، بەڵام مەوداي بەختەوەريي مامۆستا لە بووني باوكێكي وا زانا و تێگەيشتوو و بليمەت زۆر ناخايەنێ و بەداخەوە لە تەمەني ١٣ ساڵيەوە لە نيعمەتي باوك بێبەش دەبێ. ماڵاوايي كردني باوكي زەبرێكي قورس بوو بۆ جەنابي مامۆستا لەو تەمەنەدا. ئەو كارەساتە خولياي فێربوون و زانين لە جەنابي مامۆستا كەم ناكاتەوە و بۆ فيربووني باقي زانستەكان و بەتايبەت زانستە دينيەكان لە خزمەت مامۆستاياني زۆر گەورەي ئەوكاتدا درێژە بە خوێندن و فيربوون دەدات. چارەنووس مامۆستا دەخاتە ناو هەل و مەرجێك كە هاوتەمەنەكاني چ ئەوكات و چ ئێستا كەمتر بەرەوڕووي دەبن و هەر زوو لەگەڵ دونياي دەوروبەري ئاشنا دەبێ و چاو و گوێي دەكرێتەوە و لەكڵ دەردێ. ئەويني خوێندن و مەعريفە، مامۆستا سەيد جەلال پەلكێش دەكا بۆ ناوچەكان و شار و دێهاتەكاني كوردستان، وانەي مەلايەتي دەخوێني و ئەزمووني زۆر پڕبايەخ كۆ دەكاتەوە و لە ڕێگاي ئاشنا بوون لەگەڵ زۆر كەسايەتي ناودار و شۆڕشگێڕي كوردستان و هەروەها كاريگەريي كەسايەتي ينيشتمانپەروەري قازي مەلا شێخ ساڵحي باوكي لەسەر جەنابي مامۆستا سەيد جەلال، لەگەڵ كێشەي نەتەوە زوڵملێكراو و چەوساوەكەي ئاشنا دەبێ و هەستي نەتەوەيي تێيدا چەكەرە دەكا و گەشە دەستێنێ.
لەتەمەني ١٨ ساڵيەوە وێڕاي جەنابي مامۆستا شێخ عيزەدين حسێني براي و بەهانداني ٢ كەسايەتيي شۆڕشگێڕي ناوچەي موكريان، پەيوەستي ڕيزەكاني كۆمەڵەي ژيانەوەي كورد دەبێ و سوێندي نەتەوەيي بۆ خزمەت بە گەل و نيشتمان دەخوا و بۆ يەكەمين جار تێكەڵ بە كاري سياسي و خەباتي نەتەوەيي دەبێ. مامۆستا بەو پەڕي دڵگەرمي و دڵخۆشي و ئيمانەوە ئاوێتەي خەبات بۆ ڕزگاري لە دەست زولم و زۆريي داگێڕكەراني كوردستان دەبێ و لەو تەمەنەدا بە شێوەي هۆنينەوەي شيعر و پەخشاني شۆڕشگێڕانە هەست و ناخي سارێژ لە نەتەوەيي و ئاييني خۆي دەردەبڕێ. لەپاش كوژانەوەي مۆمي تەمەني كۆمەڵەي ژێكاف و لە دواييدا ڕووخاني كۆماري كوردستان، لەسەر كار و چالاكيي شۆڕشگێڕانەي بەرەوام دەبێ و بە تێپەڕكردني كات بە فێربوون و سەوداي تيگەيشتن لە كێشەي نەتەوەەكەي، ڕوحي نەتەوەيي زياتر و زياتر تێدا باڵا دەكا و گەشە دەستێنێ. لەماوەي ساڵەكاني ١٣٢٤ تا ١٣٥٧ ي هەتاوي بەهۆي زاڵبووني هەل و مەرجي لەڕادەبەري سەركوت و گوشاري ڕژيمي پاشايەتي، بەشێوەي نەهێني ئەركە نەتەوەييەكاني بەجێ دێنێ و داڵدە و پشت و پەناي شۆڕشگێران دەبێ و بۆ بەرزڕاگرتني هەستي نەتەوايەتي، لەناو جەماوەر هەڵدەسوورێ و لەو پێناوەدا دەيان جار تووشي مەترسي و لێپێچينەوەي مەئمووراني دەوڵەتي پاشايەتي دەبێتەوە، بەڵام بەو حاڵەش مامۆستاي كۆڵنەدەر لەخەبات و كاري شۆڕشگێڕي پاشگەز و سارد نابێتەوە و تەنانەت زياتر لەجاران سوورتر دەبێ لەسەر حەوجێي بەرخودان و بەبەرەكانيي زوڵمي داگێڕكەران.
ئاكار و هەڵس و كەوت و لێدوانەكاني مامۆستا دەبێتە هۆي ئەوە كە لەنێو خەڵكدا بەسيمايێكي شۆڕشگێر و ڕيێبەرێكي لێبڕاو وخەباتكار بناسرێ و متمانەي جەماوەر لە شارە جياجياكاني كوردستان وەدەست بێنێ، هەر بۆيە لە بەرەبەري گەرم بووني خەبات دژي ڕژيمي پاشايەتي، جەنابي مامۆستا سەيد جەلال چالاكيەكاني بەرفراوانتر دەكا و چاونەترسانە و ڕاستەوخۆ دەست دەكا بە دژايەتي ڕژيمي شا و بە وتارەكاني لە ميتينگەكان و لە بۆنە جياجياكان، هێرشي سەخت دەكاتە سەر دەسەڵاتي شا و ڕژێمە گەندەڵەكەي و كورەي خەبات دژي پێكهاتەي دەسەڵاتي ديكتاتۆري گەرمتر دەكا. لە يەكێك لە لێدوانەكاني ساڵي ١٣٥٧ ي هەتاوي لە گۆڕستاني سەقز لە ڕێورەسمي بەخاك ئەسپاردني شەهيداني ڕێپێواني سەقز، لە كاتێكدا كە هێزەكاني ڕژيمي شا دەسەڵاتي تەواويان لەدەستدا مابوو، زۆر بەتوندي دژي شا لێدوان دەدەا و نووكي هەرەمي دەسەڵات دەكاتە ئامانجي هێرشەكاني و لەگەڵ ئەو هێرشە تووندە بۆسەر شا، ژمارەيێك لەو كەسانەي لە قەراغەوە بوون شوێنەكەيان جێ هێشتووە و هەروەها چەند بەناو سياسەتمەدارانێكيش كە ئێستا لەدەرەوەن و خۆيان بە قەيوم و دەمڕاستي خەڵكي كورد دادەنێن، لەرزە دايگرتبوون. مامۆستا هەر بەو ڕوحيەتە ئازا و خۆنەبوێرانەي، سەركردايەتي شۆڕشي دژي سەڵتەنەتي لەشاري بانە دەگرێتە ئەستۆ و بەهۆي كەسايەتي خۆشەويستي و متمانەي گشتي بەرانبەري هێزەكاني ڕژيمي شاهەنشاهيدا وێستايەوە و لە ئاكامدا كۆنترۆڵي شار دەكەوێتە دەستي جەماوەر و شۆڕشگێران.
يەكێك لە تايبەتمەندييەكاني كاركردني مامۆستا ئەوە بوو كە ئەرك و كارەكاني بە ڕا و تەگبير ئەنجام دەدا. هەر بۆيە لەكاتێكدا دەسەڵاتي ئيدارەي شاري بانەي بەتەواوي لە ئەستۆ بوو و جەماوەر لەقسەي دەرنەدەچوون، بەوحاڵەش كوميتەيەكي بۆ بەڕێوەبردني شاري بانە پێكهێنا كە جەنابي مامۆستا كاروباري ئيداري و كۆمەڵايەتي و سياسيي شاري بانەي بە ڕا و تەگبير لەگەڵيان بەڕێوەدەبرد. لە دواي هاتنە سەر كاري خومەيني و پێكهاتني هەيئەتي نوێنەرايەتي كورد و شكڵ گرتني ڕێكخراو و حيزبەكان، مامۆستا سەيد جەلالەددين لەو قۆناغەدا خۆي لە ناو ڕێكخستني دەفتەري مامۆستا شێخ عيزەدين حسێني برا گەورەكەي دەبينێتەوە و وەك ئەندامێكي دەفتەري مامۆستا شێخ عيزەدين كە لە سەرانسەري كوردستان خاوەن ڕێكخستن بوو، كار دەكا و جەماوەري شارەكاني كوردستان لە هەلومەرجي كوردستان و داواكاني ئاگادار دەكاتەوە و تەبليغي كوردايەتي دەكا. لەشاري بانەش جەنابي مامۆستا لەوپەڕي ژيري و سياسەتمەدارييەوە ئەركەكەي سەرشاني ڕادەپەڕێنێ و ئەوشارە دەكاتە قەڵايێكي قايم لە بەرانبەر دژمنان و لەو سەردەمەدا هيچ شارێك بەڕادەي بانە ڕێكخستن بەخۆيەوە نابينێ. مامۆستا بەزانيني ئەوەي كە مانەوەي بەرگي سەركەوتن لە دەستي شۆڕشگێڕان، پێويستي بە هێز هەيە، لەهەمان كاتدا كە پێش بە تاڵان چووني پادگاني شاري بانە دەگرێ، لەهەوڵي دەستخستني چەك و چۆڵ بۆ پارێزگاري و كەڵك لێوەرگرتني لەكاتي پێويست دا دەبێ. مامۆستا كە نايهەوێ پادگاني شار بە تاڵان بچێ و بەشێوەيێكي هەڕەمەكي بەتاڵ بكرێ لەچەك و چۆڵ، پێش بە هەڵكوتانە سەر پادگان دەگرێ و لەهەمان كاتيشدا بەشێوەيەكي لێزانانە ٤٠٠ بڕنەو لە مێهدي بازەرگان سەرۆك وەزيري كاتيي دەسەڵاتي نوێ وەردەگرێ و بە سەر دێهات و ناوچەي بانەي دابەش دەكا، تا لە كاتي مەترسي و نەبەرد لە بەرانبەر دژمناندا كەڵكيان لێ وەرگێڕێ.
ئاكامي ئەو تەدبير و سياسەتي مامۆستاي نەمرمان كاتێك دەردەكەوێ كە لە ڕۆژي ١٠ي خەزڵوەري ساڵي ١٣٥٨ ي هەتاوي، كاتێك كە هێزي قودسي تەيار بە چەك و چۆڵي پێشكەوتوو و بە ژمارەي زۆري ڕژيم ڕەوانەي كوردستان دەكرێن، بۆ بەناو پاك كردنەوەي هێزە شۆڕشگێڕەكان لەگەڵ خۆڕاگرييەكەي كەم وێنەي ئەو پێشمەرگانەي دەفتەري مامۆستا كە دوايي خۆيان لە ڕيزي سازماني خەبات دا بينييەوە، بەرەوڕوو دەبن و ئەو هێزە زۆرە كە ژمارەييان نزيك بە ٥٠٠ چەكدار و زياترلە ٧٠ ماشێن و ٢ تانك و ئيسكۆرتيي ٢ هێليكۆپتەر بەتەواوي تەفروتونا دەكرێن، كە بەداخەوە ٨ پێشمەرگەي سازماني خەبات لەو حەماسە كەم وێنەيەدا گياني پاكيان بەختي گەلەكەيان دەكەن.
لەدواي ئەو زەبرە قورسە، خومەيني لە ڕاگەيەندراوێكدا دەڵێ:”مردم كورد من صداي شما ڕا شنيديم» و لە پاش ئەو شكستەي هێزەكانيان لەبانە، وتووێژەكان لەگەڵ هەيئەتي نوێنەرايەتي كورد دەست پێدەكا. يەكێكي ديكە لە هەڵويستە دروستەكاني جەنابي ماموستا لەو سەردەمە، كاتێكە كە شاندي وتووێژكاري ڕژيم بە سەرپەرشتيي داريوشي فروهەر بە مەبەستي درزخستنە ناوڕيزەكاني گەلي كورد ڕەوانەي بانە دەكرێن و داوا لە جەنابي ماموستا دەكەن كە بۆ گوێگرتن لە ويست و داواكارييەكاني نەتەوەي كورد، چاويان بەجەنابي بكەوێ، مامۆستاي نەمر زۆر ژيرانە و وردبينانە پيلاني شومي شاندي ڕژيم لەمەڕ لێكنرازاني يەكێتي ڕێزەكاني كوردي بۆ دەردەكەوێ و وەڵاميان بۆ دەنێرێ كە ويست و داواكاري ئێمە گشتيە و هيئەتي وتووێژكاري كوردستان بە تێكرا وەڵامدەرە و بێجگە لەو چوارچێوەيە ئێمە ووتەێكمان نييە لەگەڵ ئێوە.
مامۆستا سەيد جەلال كە خاوەن كەسايەتيەكي يەكجار بەرز بوو، لە شۆڕشگێري و هەستي مرۆڤدۆستي و نەتەوەييشدا لە لووتكەدا بوو. لە بەڵگەيێكي ديكە بۆ ئەو ڕاستيە، لەكاتي هێرشي هێزەكاني ڕژيم بۆسەر كوردستان و فەرماني جيهادي خومەيني، خەڵخاڵي جينايەتكار چەندين جار، كەسايەتي و مەلاكاني شاري سەقز و بانە دەنێرێ و بە نامە داوا لەجەنابي مامۆستا دەكا كە بگەڕێتەوە و ببێتە خاوەن دەسەڵاتي كوردستان، بەڵام مامۆستاي خەباتكارمان هەروەك چۆن لەو سەردەمەي خەڵخاڵي لێقەوماو بوو و دوورخرابۆوە بۆ شاري بانە جەنابي مامۆستا بە هەستي مرۆڤ دۆستي و شۆڕشگێرانەي داڵدەي دابوو، هەر بەو ڕوحە مرۆڤانە و نەتەوەييە وەڵامێكي زۆر سەختي پێدەداتەوە و دەڵێ: «ئەتۆ كە دەستت تا ئەنيشك بە خوێني ڕۆلەكاني نەتەوەكەم سوورە چۆن دەتواني داوا لەمن بكەي و پێم بڵێي بۆ پلە و پايە بگەرێمەوە لاي بكوژ و كاولكەراني گەل و خاكەكەم، بەو پەروەردگارەي ئێوە باوەرتان پێ نييە هەتا وەرنەگرتنەوەي حەقي هەموو ئەو خوێنانەي ئێوە بوونە هۆي ڕشتني و ستاندني مافەكانمان ڕێزەكاني شۆڕش دژي ئێوە بە جێ ناهێڵم».
مامۆستا سەييد جەلال كە وەك ڕێبەرێك هەرەكاريگەر لە كوردستان دەردەكەوێ و بەهۆي لێهاتوويي و پشتيواني و متمانەي لەرادەبەدەري جەماوەريي دەتوانێ كاريگەري زۆر باش دابنێ لەسەر ڕەوتي جولانەوەي كورد، لەوسەردەمە بەمەبەستي ڕێكخراوتر كردني ڕيزەكاني كورد و خستنە ناوچوارچێوەي هەوڵەكاني لە تەشكيلاتێكي ڕێك وپێك و بەفيڕۆ نەداني وزە و پوتانسيەلي بەشێكي زۆر لە جەماوەري كوردستان و چەندين فاكتەري ديكە، بەڕێزيان بير لە دامەزراندني ڕێكخراوێكي سياسي-نەتەوايەتي و ئيسلامي دەكاتەوە. لە فاكتەرەكاني ديكەي گەڵاڵەبووني ئەو بيرە لە مێشكي مامۆستادا دەتوانين ئاماژە بەو بۆشاييە بكەين كە بە هۆي نەبووني ڕێكخراوەيەكي لەو شێوەيە كە بتوانێ خاوەن باوەڕاني ئەو جۆرە لە خەبات لە دەوري خۆي كۆ بكاتەوە و هەروەها ئەو هێزي پيشمەرگەيەي لەژێر ڕێبەريي جەنابي مامۆستا دا و لەچوارچێوەي دەفتەر هەڵدەسووڕان و قارەمانانە حەماسەي جێژني قوربانيان خوڵقاندبوو تووشي بێ هيوايي و لێك هەڵپرژان نەبن و هەروەها بۆ سەڵماندني ئەوەي كە تۆمەتەكاني خومەيني و دارودەستەكەي لەسەر ئەوەي كە كورد كافرن و جيهادي لەدژ كردن، لەپاش ڕاوێژ لەگەڵ جەنابي مامۆستا شێخ عيزەدين و كەسايەتي شۆڕشگێڕ و نيشتمانپەروەر و ئايينيي ديكەي كوردستان بەردي بناغەي سازماني خەبات ـي نەتەوايەتي و ئيسلامي كوردستاني ئێراني لە ٥ي خەرماناني ١٣٥٩ دامەزراند و بە وزە و تينێكي تر و لەقاڵبي ڕێكخراوێكي سياسي و نەتەوەي خەباتي گەلي كوردي بەرەوپێش برد.
مامۆستاي كۆڵنەدەر، بەدامەزراندني سازماني خەبات، ئەركي شۆڕشگێڕانەي قورستر دەبێ و خزمەت بە ئاو و خاكەكەي لە چوارچێوەي ئەو تەشكيلاتە ڕەسەنە كە لە ناخي كۆمەڵگاكەي هەڵقوڵيوە و لەسەر دەستي خەباتكاران و نيشتمانپەروەراني كورد بە بێ دەستێوەرداني لاوەكي و بە پرۆگرام، سياسەتێكي خۆماڵيانە دامەزراوە درێژە پێدەدەا. پێشوونە و سيماي ديار و خۆشەويستي مامۆستا لە گەشەسەندن و پەلوپۆ هاويشتني سازمان لە بەرينايي كوردستان، دەورێكي بنەڕەتي دەبێني و هەر بەو هۆيەوە و لێبڕاويي و قارەمانەتي پێشمەرگەكاني سازمان لە ماوەێكي كەمدا سازماني خەبات ناووناوبانگ پەيدا دەكا و وەك هێزێكي كاريگەر لە هاوكێشەكاني كوردستاندا دەوري دەبێ.
دەبێ ئاماژە بەو كەسانەي كە هاوكاريي ماموستاي نەمريان كرد بۆ دامەزراندني سازماني خەبات و گەشەسەندني بكەم كە بريتين لە: شەهيدان مامۆستا ئارام و شەهيد مامۆستا خەليلي شەريفيان و مەرحووم مامۆستا مەلا خدري عەبباسي و مەرحووم ماموستا مەلا كەريمي سەييادي (ساردەكۆستاني).
جێگەي داخە كە لەدواي دامەزراني سازمان، هيزە كاني ديكەي كوردستان كۆسپ و تەگەرە بۆ سازماني خەبات و جەنابي مامۆستا دروست دەكەن كە ئەو كۆسپانە يەكێك لە كێشە گەورەكان لەبەردەم كار و هەڵسووراني سازمان و گەشەسەندني بوو. بەڵام سەرەراي هەموو گوشار و لەمپەرەكاني لايەنەكان و هەروەها پيلانەكانەكاني ڕژيمي ئێران، ماموستا ي بەڕێز بۆ ساتێكيش لە ڕێبەري كردن و بەشداري لەخەباتي نەتەوەيي سارد و ماندوو نەدەبۆوە و بەوپەڕي لێبڕاوي و بەكەمترين ئيمكاناتەوە ئەركي حەق ويستي و يەكسانيخوازي و دژە ديكتاتۆري لەسەر بناغەي بير و بۆچون و ئاكار و كردەوەي دروست و پەسەندي بە جێ دەگەياند.
مامۆستا تا دوايين ساتەكاني ژيانيشي لەپيناو گەل و باوەرەكەي هەڵسووڕا. يەكێك لە ديارترين و جێگەي شانازيترين تايبەتمەندييەكاني مامۆستا ئەو ڕوحيەي خۆنەويستي و لێبڕاوييەي بۆ شۆڕش و خزمەت بە كوردستان بوو. پێوانەي هەڵسەنگاندني گەورەيي شۆڕشگيڕان دەگەڕێتەوە بۆ ئەوەي كە ئەو كەسە شۆڕشگێڕە ئامادە بووە چەندە نرخ و باج لەپێناو شۆڕشدا بدا. بەڕاستي بە پێوانە گرتني ئەو وتەيە، دەبێ بڵێين ماموستا گەورەترين و بەرزترين پلەي شۆڕشگێري هەيە.
لە ديرۆكي نەتەوەكەماندا كەم نەبوون ئەو قارەمانانەي كە ئامادەي خۆبەختكردن بوون لەپيناو بيروباوەڕ و نەتەوەەكەيان، بەڵام دەگمەن بوونە ئەو كەسانەي كە تەنانەت دەستيان بە جگەرگۆشە و ماڵ و كەسەكانيشيانەوە نابێ بۆ ديفاع لەنيشتمان و گەلەكەيان. سرووشتي مرۆڤە كە ئامادەي هەموو ڕەنج و مەينەتێكە لەپێناو حەسانەوەي ساتێكي بنەماڵە و ڕۆڵە و جگەرگۆشەكەي و تەنانەت ئامادەي خۆبەختكردنە لەپيناويدا. بێ گومان زۆر زەحمەتە مرۆڤ بەسەر ئەو هەستە سروشتيە دا زاڵ بي. بەڵام ماموستاي ڕێبەرمان ئەو كاتە دڵخۆش بوو كە ڕۆڵەكاني لە ڕيزي پێشەوەي شەڕەكاندا بوون و فەرماندەيي خۆڕاگرييەكانيان كردووە كە هەر لە ئاكامي خۆنەويستي و شۆڕشگێري مامۆستا و كور و كەسەكاني، كورێكي قارەماني بەناوي كاك سيد عەبدولكەريمي حوسێني شەهيد بوو. هەروەها ڕۆڵەيێكي ديكەشي كە بەريز كاك بابەشێخي حسێني يە، شهيدي زيندووە و دەيان جار لەمەيدانەكاني نەبەرد لەبەرانبەر داگێڕكەران دا و بە كردەوەي ترۆريستي ترۆريستاني ڕژيم بەسەختي زمدار بووە. ئەوە لەكاتێكدا بوو كە كە هەتا ئەو دواييانەش كاتێك جەنابي مامۆستا بيرەوەري شەهيدي نەمر كاك سەييد عەبدولكەريمي دەگێرايەوە نەيدەتواني پێش بە هەستي سارێژ لە جەرگ خۆشەويستيەكەي بگرێ و بەوپەري شانازييەوە فرمێسك لەچاوە پڕسۆزەكاني دەهاتنە خوارەوە.
بەڵێ ماموستاي هەردەم زيندوومان دەيفەرموو ڕۆڵەكانم لەپيناو ڕزگاري و عيزەت و كەرامەتي نەتەوەيي فيداكاريان كرد و هەرگيز دەستم وەبەرنەنان و هەروەها دەيفەرموو چۆن دەتوانم بە ڕۆڵەي خەڵكي بڵێم خۆتان فيدا بكەن و نەهێڵم ڕۆڵەكاني خۆم بچنە مەيداني نەبەرد. ماموستا ئەو تايبەتمەندييانەي، ئەو ڕوحە پڕ لەسەداقەت و خۆنەويستيەي هەبوو كردبووي بە خۆشەويستي خەڵك، بۆيە دەڵێين خەسارەت و زيانێكي قەرەبوونەكراوەمان لێ كەوت،بۆيە دەڵێين ڕێبەر و خەباتكار و شۆڕشگێري بێ پەڵە و لێهاتوومان لەدەست دا.
لەتايبەتمەندييە ديارەكاني ديكەي مامۆستا ئەو هەستە بەرزە نەتەوەييەي جەنابيان بوو، ڕازي نەبوو تەنيا لەپێناو بەشێك لەگەلەكەي لەكوردستاني ئێران بە سەر و ماڵ و گياني خەبات بكا، بەڵكو هەستي نەتەوەييەكەي سنوورە دەستكردەكاني داگێڕكەرانيشي بەزاندبوو و بەدەيان جار لەپێناو مەسڵەحەت و قازانجي كوردستانيان و بەتايبەت كوردستاني عێراق خۆي خستە مەترسيەوە. لەكاتێكدا كە عێراق بەهۆي هەل و مەرجي سياسي و هاوسەنگي هێز ئەوپەري يارمەتي هێزەكان ئۆپۆزسيۆني ئێراني دەدا، سازماني خەبات بەرێبەرايەتي مامۆستاي ڕێبەرمان بەحەشاردانەوەي پێشمەرگە و داڵدەداني شۆڕشگێڕان، يارمەتي بەريني پێ دەكردن و جەنابيان و سازماني خەباتي دەخستە مەترسيەوە. ئەو هەستە لێوانلێو لەنيشتمان خۆشەويستيەي بوو، بۆيە نەدەترسا و بوێرانە و بەوپەري بروابەخۆبوون و سەربەرزييەوە خزمەتي بەگەل و نيشتمان و نەتەوەكەي دەكرد.
لەتايبەتمەندييە جێ ستايشەكاني ديكەي مامۆستا سەداقەت و ڕاستگۆيي ئەو زاتە پاكە لەگەڵ نەتەوەكەي بوو، لەگەڵ ئەوەي كە ڕێبەرانمان چەندە پێويستە بە زانست و مەعريفە و ئەزموون تەياربن دەبێ ئەوەندەش خاوەن ئەخلاق و ڕەوشتي بەرز بن، ئەگەر بانگەوازي ڕەواترين و باشترين سيستەمي حوكمرانيي بكەي كاتێك ڕەوشتي بەرز و ڕاستگۆ و سادق نەبي، خەڵك بە ڕادەي نووكە دەرزيێكيش ووتەكاني بە هێند وەرناگرن. مامۆستا سەييد جەلال ئەو كەسايەتيە بوو كە وێراي زانايي و شارەزايي لەكاروباري سياسي و ئەزمووني زۆر بەنرخ خاوەن بەرزترين ڕەوشت و خووخدەي بەرز بوو. هەميشە دەيفەرموو ئەگەر مەبەست لەكاري سياسي درو و فريو بێ ، هەرگيز ئامادە نيم درێژە بەخەبات و كاري سياسي بدەم. پێناسەي ماموستا بۆ كاري سياسي و خەبات بريتي بوو لە سەداقەت و ڕاستگۆيي و لێبراويي و فيداكاري و خۆنەويستي و هەست بە بەرپرسايەتي. ماموستاي نەمرمان هەرلەسەرەتاي تێكەڵبوون بەكاروباري سياسي بەو تيروانينەوە دەستي پێكرد و هەر بەو تيروانينەش ماڵئاوايي لە ڕێزي خەباتكاران و كاري سياسي كرد.
هەزاران داخ بۆ كۆچي دوايي مامۆستاي بليمەت و زانا و خۆنەويستمان، بەراستي زياني لەكيس چووني ئاوا كەسايەتيێك هەرگيز قەرەبوو ناكرێتەوە. لەوە زياتر درێژەي پێنادەم و هيوادارم لەداهاتوو دا زياتر تيشك بخريتە سەر ژيان و تايبەمەندييەكاني جەنابي ماموستا سەييد جەلال حسێني. ڕوحي بە بەهەشتي بەرين شاد بێ و ئاكار و بيرو بۆچوونەكاني ڕووناكەرەوەي ڕێگەمان بێ.
برچسب:
،
ادامه مطلب
بازدید: